بابكر سلك: جره هوا يا هوا

by شوتايم1

 

امس تم تأجيل مباراتنا ضد حي العرب
لانو الكهربا قاطعة
ومدير استاد امبابه بعزبة الصعايدة

يعلم تماما انو الكهربا بتقطع يوم الأربعاء من الساعة خمسة مساء

يبقي مدير الاستاد بتاعنا مفروض بل يجب عليه ان يكون عارف
يقوم السيد المدير يجيب برميل جاز علوق شدة قبل المغرب

يعني مغربية

ويقعوا ليك في الجنريتر

دور…..دور… .دور

والجنريتر راسو والف سيف

والواقع يقول الجنريتر جاري هوا يا هوا

ايها الناس

هذا الجنريتر الفخم اهدانا له السيد اسامة داؤود

يعني جنريتر ماركة

اسبيرو راقد

مهندسنو في

سبب يخليهو مايدور مافي

سبب يخليهو يجر هوا مافي

الا اذا كان المشرف هوا

علي كل
حكم مدير الاستاد علي اللاعبين ان يلعبوا نهارا تحت شمس الخرطوم التي تبلغ درجة حرارتها ٥١ درجة

درجة الحرارة بتدخل طب عديل كدة

والشاعر لما قال شمسك بقت شمسين

صدق لانهن في الوكت داك كانن شمسين

لكن في هذا الزمان كلو شي زاد

الشمسين لحقن الدولار

بقن خمسمية

سخانة اقنعتنا بانو ربنا دخل السودان ده النار

سخانة بتوجع في الجلد

لكن انا مستبشر بيها خير

لانو زمان لما البلد دي خيرها كان باسط

كان في الرماضة

كنا صغااار

وكانت الرماضة بتمنعنا من المشي حفايا

اليومين دي الرماضة بدت

معناها الخير جايينا

لكن سخانه غريبة

تمنعنا نمشي حفايا وتجبرنا نمشي عرايا

لكن مدير الاستاد قصر شديد

ايها الناس

ده شكل من اشكال الاهمال الاداري البودي في داهية

هو خطأ وقصور مافي كلام

والبسكت عليهو يبقي بتاع ناسات

والببحث عن مبررات ببقي برضك بتاع ناسات

والبضخم الموضوع ويلوكو لبانة مترصدا ببقي برضو بتاع ناسات

الناسات التانيين

لكن الموضوع اهمال وقصور كبير يستحق النقد بمنتهي الشفافيه

نتمني ان نستفيد من الموقف والنقد لاجل الكيان

والداير يتاجر بالموقف

نقول ليهو الدولار نزل

المهم

القصور حاصل

ولن ننسي ان المسؤول من المباراة في المقام الاول هو الاتحاد

وبرضو مابنعفي مدير الاستاد

ايها الناس

تاني من بلدنا رحل زول جميل

بالامس حملت الانباء رحيل مولانا جمال حسن سعيد الرياضي العطبراوي الشرس السمح

الممسك الكريم

الهاش اللئيم

الجميل في كل الظروف

فالرجل كان يكون بحسب الموقف الذي يجب ان يكونه

نعزي انفسنا قبل اهل عطبرة الحديد والنار

ننعيه في المريخ قبل ان ينعيه امل عطبرة

ونعزي الوسط الرياضي في الفقد الجلل

اللهم ارحم عبدك جمال واجعل مأواه الجنة

ايها الناس

ان تنصروا الله ينصركم

اها

نجي لي شمارات والي الخرتوم

تعرف يا والينا

كل الحاصل لينا

اننا رجعنا البيوت يا والينا

سلك كهربا

ننساك كيف والكلب قال الشوارع دي مالها عيبوها لي

والي لقاء


اضغط هنا للإنضمام لشوتايم نيوز على الواتساب



1 comment

عبدالمنعم 4 يونيو، 2021 - 5:07 م

ديم سلك الدخلو هلك

Reply

Leave a Comment