بابكر سلك : جكمنة

by شوتايم3

*محمد سيد أحمد النائب الأول لحازم.
*يعرف بالجاكومي.
*يعشق الصدامات.
*ويذكرني بجد صاحباً لي بتاع مشاكل.
*زول لسة فيهو باقي همبتة.
*يوم قابلت جد صاحبي ده بالمحطة الوسطى أمدرمان.
*والمحطة الوسطى أم درمان لغير الناطقين بها.
*هي موقف المواصلات العريق العتيق الذي تطل عليه نقطة بوليس السوق زمان
*وشرقه كافتيريا فيتال وصيدلية أبو نخلة العريقة.
*وكان فيها حارات لوقوف التاكسي ومظلات .
*والترماج كان له موقعه المحترم فيها.
*وياحليل ميامي.
*ميامي ده ما اسم دواء.
*ميامي ده أشهر وأشهى حلواني في أمدرمان.
*لما كان اسمها أمدرمان .
*وأذكر أن أحدهم كان بحكي لأحدهم تاني عن المحطة الوسطى وقيافتها ونظافتها سنة ستة وأربعين.
*وذكر ليهو كيف إن(البيرة)كان بااااااردة.
*الكهربا مابتقطع الزمن داك.
*وحكى ليهو عن الواحد يقطع ليهو كباية على مشارف الكافتيريات وزول بسألك مافي .
*أحدهم التاني قال ليهو ربنا ماكان بسألكم؟؟؟.
*أحدهم الأولاني قال ليهو أقول ليك سنة ستة وأربعين ياخ.
*نرجع لي جد صاحبي.
*لقيت ليك لمة في المحطة الوسطى ودفر وكوراك.
*أشوف ليك جد صاحبي وسط العوة.
*سألت الناس الحاصل شنو؟؟؟.
*قالوا لي الحاج ده مكبر الموضوع ساي وهو غلطان .
*مشيت عليهو لقيتو بالعمة والتوب والعصاية والسكين والسوط.
*منفعل جداً .
*قلت ليهو داير النصيحة ياحاج؟.
*قال لي مادايره .
*طبعاً لأنو عارف نفسو غلطان.
*رفض النصيحة نهائي.
*نرجع للجاكومي .
*شخصية في ستة شهور إنقسم حولها المريخاب.
*منهم المؤيد.
*وديل أطلقوا عبارة جكمنة لأية وهمنة .
*ومنهم المعارض الذي يرى الرجل نسخة من جد صاحبي بتاع المحطة الوسطى.
*ولاتوجد منطقة وسطى مابين ذلك وذاك.
*مافي زول وسط .
*ياجكمنة لأية وهمنة.
*ياجد صاحب سلك.
*لكني أقول لي ديل ولي ديلك .
*مافي زول صاح طوااالي.
*ومافي زول غلط طوااالي.
*ممكن مرة جكمنة لأية وهمنة.
*وممكن مرة جد صاحب سلك.
*حازم فلقنا(بالجرجير) لإعادة هيبة القلعة .
*وطلع جرجيرو واحد من خوابيرو.
*جكمنة كشف أوراق حزومي ولجأ لمن لجأ له في عملية صيانة الاستاد.
*برغم أن اللجوء كان لجوء (سياسي) جل أهل قرار منح الجواز المريخي يرفضه.
*ولكنه كشف أوراق جرجير حازم.
*واستمر جكمنة في درب كشف الحقائق.
*حتى كان (الفيديو) المسرب.
*وجكمنة ولا هاميهو.
*قايمة عليهو الصراحة.
*وبرضك في (الفيديو) المسرب قالوا لجكمنة داير النصيحة.
*قال ليهم مادايره .
*وواصل الرجل إلى أن وصل لمرحلة مطالبة الهلال بالغرامة بتاعت الاستاد.
*خمسينية الف دولار.
*دولار ينطح دولار.
*جبل عامر مايمرق دولار قدر ده.
*وهي حق مريخي خالص.
*في الحتة دي بالذات إتفق الجميع على جكمنة لأية وهمنة.
*ومطالبة جكمنة كشفت تقاعس مجالس قبله عن المطالبة.
*بالذات المجلس الذي في زمنه تم توقيع الغرامة.
*وكشف جكمنة كيف أن السياسة كانت تتدخل بالشأن الرياضي.
*وإن عدم المطالبة كان فقط لاستقرار الموسم الرياضي .
*واستقرار البلد .
*واستقرار الحكومة وقتها .
*واستقرار الحزب.
*فلو طالب المريخ بالسداد .
*سيرفض الهلال الاستجابة .
*ويضطر الجهاز للسداد.
*لذا صهينوا لأن السياسة كانت تقود الرياضة من أضانها .
*شكراً جكمنة على هذه الوهمنة التي كشفت لنا كيف أننا كنا مخنوقين رياضياً بذراع السياسة الذي يلتف على عنق الرياضة.
*في دي طلعت ماجد صاحبي.
*أيها الناس.

الانتباهة
*إن تنصروا الله ينصركم
*أها .
*نجي لي شمارات والي الخرتوم.
*كان شفت ياوالينا.
*يقولوا دايرين يفاوضونا.
*يجكمنوا علينا وكلو يوم يكتلوا زول فينا .
سلك كهربا
ننساك كيف والكلب قال لي أسي ماعرفتوا من فض الإعتصام؟ جنس هبالة عليكم
وإلى لقاء.
سلك

اضغط هنا للإنضمام لشوتايم نيوز على الواتساب




Leave a Comment