يوسف البروف يكتب:بالدارجي العميق….جنوب الحزام الناس التمام

by شوتايم2

 

 

 

 

بالدارجى العميق

جنوب الحزام
الناس التمام

يوسف البروف

زهجان وقهران ومفلس وما قادر تدفع رسوم المدارس والدنيا دى ضايقة بيك وحاسى بنفسك مخنوق ما عليك الا تمشى مايو، اى مايو بتاعة جنوب الحزام الواحدة دى،اقول ليك حاجة الناس مش بتشتغل وبتعمل تحويشة عشان يمشوا رحل فى عوالم بعيدة يكتشفوا فيها المستخبى ويمتعوا عيونهم بالدهشة ويجوا راجعين لديارهم بروح جديدة ولياقة جديدة ومعلومات جديدة ونفسيات جديدة وكده، اها العالم ده كلو انا اختصرتو ليك فى مايو دى، اول حاجة يوم الجمعة قشتك لعيونك من النوم كده ما تنتظر شاى الصباح زاتو بس من محل انت ساكن وشوف مواصلات مايو بوين، اول ما تصل مستشفى بشاير قول لبتاع الحافلة نزلنى، وكان كمان عندك عربية اسال أقرب زول من سوق دبى، اها سوق دبى ده عالم تانى، عادى جدا تلقا ليك طيارة اوكرانية مدورة بمضيفاتها وممكن تلقا القماش الكفنوا بيهو المرحومة اليزابيث وممكن تلقا كدارة ميسى وممكن تلقا سيف عثمان دقنة وممكن تلقى الكريم البتتمسح بيهو مروة الدولية، شوف اى حاجة فى الدنيا دى ممكن تلقاها فى السوق ده، اما عن الاسعار فما تشيل هم عندك تدفع ما عندك تشيل، فى حاجة مهمة جدا فى سوق دبى ده بالذات وهى عامل الزمن، قدر ما جيت بدرى انت الكسبان، فى حاجات بتكمل قبال الشمس ما تطلع، بعدين عشان تعرف من هسه ما تسال كتير والسعر الاولانى القالوا ليك ده يا تدفع وتشيل وتتخارج ويا كمان تكبرها لحتة تانية، اما فيما يتعلق بالاجهزة الكهربائية والموبايلات والساعات والوصلات مافى حاجة اسمها جرب لى، تجريب مافى وكهرباء مافى وزمن زاتو مافى، طلعت من سوق دبى تدقش رواكيب السجيجات، ده محل الطلاسيم، عندك حمار رايح بجيبوا ليك، مفلس بغنوك، مرتك نقناقة وكلامها كتير وطلبياتها كتيرة بشغلوها ليك هزاز، داير بنت بدوك، داير ولد بدوك، داير تقفل على كده بسكروا ليك طوالى، زوجك عرس بفوقك ليكى ودايرة تنتقمى منو بودوا ليكى قسم المسالك البولية جراحة البروستاتا على طول، حبيبتك خلتك ومشت مع واحد مرطب ودايرها ترجع ليك، الساعة تلاتة صباحا بتلقاها واقفة ليك فى الباب منتظرة وشايلة وردة حمراء ملفوفة بورقة مكتوب عليها اموت انا فى الوجاهة يا سيد الكل، اها مرقت من سوق الجماعة البجيهوا الناس عروق وبخرات ومحاية ديل على طول ادقش محلات الاكل، اها هنا بلد العجايب، فى حاجة اسمها اصبر، ودى عبارة عن كرعين جداد فقط، تانى فى حاجة اسمها تايتنك، ودى عبارة عن رسين جداد فقط، فى حاجة اسمها الملاح علينا والعيش عليك، وده الصاج فى النار وانت بتقطع من عيشتك وبتغمس فى الصاج، طبعا الصاج ده ما بكمل كلو كلو لانو سخن، اها الاغرب من الخيال ان تجد باقى الاكل بتاع المناسبات، فى ناس بمشوا الصالات بجيبوا باقى الاكل، يعنى عادى جدا تلقا ليك باقى جدادة وباقى فطيرة وباقى باسطة، اما البارد فعادى جدا تلقا باقى بيبسى وباقى كولا وباقى سفن اب وباقى ميرندا حمراء كلو فى قارورة واحدة،،،،
نواصل،،،،

اضغط هنا للإنضمام لشوتايم نيوز على الواتساب






Leave a Comment